२० पुस, काठमाडौं । देशभर हाल पश्चिमी वायुको प्रभाव कायम रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ। यसका कारण आज दिउँसो तराई क्षेत्रका अधिकांश स्थानमा हुस्सु तथा कुहिरो लागिरहने अनुमान गरिएको छ।
महाशाखाका अनुसार कोशी प्रदेशका पहाडी तथा हिमाली भूभागमा आंशिक बदली रहनेछ भने गण्डकी र कर्णाली प्रदेशका उच्च पहाडी तथा हिमाली क्षेत्रमा पनि आंशिक बदलीसहित बाँकी स्थानमा मौसम प्रायः सफा रहनेछ।
कोशी, गण्डकी र कर्णाली प्रदेशका उच्च पहाडी तथा हिमाली भागका एक–दुई स्थानमा हल्का वर्षा तथा हिमपातको सम्भावना रहेको छ। यसले विशेष गरी हिमाली क्षेत्रमा चिसो अझ बढ्ने देखिएको छ।
त्यसैगरी आज राति पनि तराईका धेरै स्थानमा कुहिरो लाग्ने सम्भावना रहेको महाशाखाले जनाएको छ। रातिको समयमा कोशी प्रदेशका पहाडी तथा हिमाली भागमा आंशिक बदली रहँदा अन्य क्षेत्रको मौसम सामान्यतया सफा रहने अनुमान छ। उच्च पहाडी तथा हिमाली क्षेत्रका सीमित स्थानमा भने हल्का वर्षा र हिमपात हुन सक्नेछ।
हुस्सु–कुहिरो, हिमपात र चिसो मौसमका कारण दैनिक जनजीवन, पर्यटन, स्वास्थ्य सेवा तथा सडक यातायातमा आंशिक प्रभाव पर्न सक्ने भएकाले आवश्यक सतर्कता अपनाउन मौसम पूर्वानुमान महाशाखाले सबैलाई अनुरोध गरेको छ।
