९ असोज, काठमाडौं ।
२४ भदौको जेनजी आन्दोलनको क्रममा कारागार तोडफोड भएपछि फरार भएका कैदीबन्दीहरू अझै ठूलो संख्यामा समाजमा खुलेआम हिँडिरहेका छन् । यसले सुरक्षा चुनौती बढाउनुका साथै विदेश पलायन हुने जोखिमसमेत उच्च रहेको सरकारी निकायहरूले बताएका छन् ।

बुधबार दिउँसो १२ बजेसम्मको तथ्यांकअनुसार ६ हजार ८१३ कैदीबन्दी अझै कारागार फर्किन बाँकी छन् । तीमध्ये ६ हजार १९१ कैदी कारागार र ६२२ जना सुधारगृहबाट भागेका हुन् ।

विवरण संकलन र निगरानी

कारागार व्यवस्थापन विभागका निर्देशक चोमेन्द्र न्यौपानेका अनुसार फरार कैदीबन्दीहरूको व्यक्तिगत विवरण संकलन र अद्यावधिक गर्ने कार्य तीव्रगतिमा भइरहेको छ ।
“हामीले अध्यागमनलाई समेत यसबारे जानकारी गराएका छौं,” उनले भने । विभागले नागरिकता र पासपोर्टलगायत कागजात अध्यागमन विभागलाई बुझाउने तयारी गरेको छ ।

अध्यागमन विभागका महानिर्देशक रामचन्द्र तिवारीले पनि निगरानी कडाइ गरिएको बताए । उनका अनुसार सबै विवरण प्राप्त भएपछि फरार कैदीबन्दीलाई सिस्टममा कालोसूचीमा राखी विदेश प्रस्थानमा रोक लगाइनेछ ।

छिमेकी देशको सतर्कता

ठूलो संख्यामा कैदीबन्दी कारागार बाहिर रहनुका कारण केही मुलुकहरूले नेपालीको भिसा प्रक्रियामा कडाइ गरेका छन् । खुला सीमाका कारण भारतमा समेत यात्रुहरूको चेकजाँच र सोधपुछ कडाइ भएको जनाइएको छ ।

कारागार फिर्ता हुने र बाँकी संख्या

२४ भदौयता देशभरका २८ वटा कारागार र ९ वटा सुधारगृहबाट जम्मा १४ हजार ५४९ कैदीबन्दी फरार भएका थिए । तीमध्ये ७ हजार ७३५ जना फर्काइसकिएको छ, भने ६ हजार ८१३ अझै फरार छन् ।
केही आफ्नै इच्छाले कारागार फर्किएका छन् भने केहीलाई प्रहरीले नियन्त्रणमा लिएको छ ।

सुरक्षा चुनौती

फरार कैदीबन्दीले आपराधिक गतिविधि दोहोर्‍याउने खतरा बढेको देखिएको छ । हालै नख्खु कारागारबाट भागेका सन्तबहादुर तामाङले आफ्नै पत्नीको हत्या गरेको घटना यसैको उदाहरण हो ।

सरकारका सम्बन्धित निकायहरूले फरार कैदीबन्दीलाई शीघ्र नियन्त्रणमा लिन सुरक्षा संयन्त्र सक्रिय बनाइएको जनाएका छन् ।