असम । भारतको असम राज्यको होजाई जिल्लामा शनिबार बिहान एक दुःखद रेल दुर्घटना भएको छ। तीव्र गतिमा गइरहेको यात्रुबाहक रेल हात्तीको बथानसँग ठोक्किँदा आठ वटा हात्तीको घटनास्थलमै मृत्यु भएको छ भने एउटा हात्ती गम्भीर घाइते भएको छ।

हात्तीलाई ठक्कर दिएपछि रेलको इन्जिनसहित पाँच वटा डिब्बा पटरीबाट खसेका छन्। नर्थ इस्ट फ्रन्टियर रेलवे (एनएफआर) का अनुसार नयाँ दिल्ली गन्तव्यतर्फ जाँदै गरेको उक्त रेल राति करिब २:१७ बजे दुर्घटनामा परेको हो।

रेलवे प्रशासनले घटनाप्रति गहिरो दुःख व्यक्त गर्दै रेलमा सवार कुनै पनि यात्रु घाइते नभएको स्पष्ट पारेको छ। चालकले हात्तीको बथान देख्नासाथ आपतकालीन ब्रेक प्रयोग गरे पनि दूरी अत्यन्तै कम भएकाले दुर्घटना टार्न नसकिएको रेलवेको भनाइ छ।

रेलवेले जारी गरेको आधिकारिक विज्ञप्तिमा दुर्घटना हात्ती आवतजावतका लागि पहिचान गरिएको ‘हात्ती कोरिडोर’ बाहिर भएको उल्लेख गरिएको छ। हाल घटनास्थलमा उद्धार तथा ट्र्याक मर्मतको काम तीव्र रूपमा भइरहेको छ र छिट्टै रेल सेवा पुनः सञ्चालन गर्ने प्रयास भइरहेको जनाइएको छ।

यस घटनाले वन्यजन्तु संरक्षण र रेल सञ्चालनबीचको समन्वयलाई थप प्रभावकारी बनाउनुपर्ने आवश्यकता पुनः उजागर गरेको छ।