बंगलादेशमा राजनीतिक हिंसाका घटनाहरू लगातार बढिरहेका छन्। विद्यार्थी नेता शरीफ उस्मान हादीको हत्या भएको केही दिनमै अर्का एक राजनीतिक नेतामाथि पनि सार्वजनिक स्थानमै गोली प्रहार भएको छ।

बंगलादेशी अखबार ढाका ट्रिब्युनलाई उद्धृत गर्दै बीबीसीले जनाएअनुसार नेसनल सिटिजन्स पार्टी (एनसीपी) का खुलना डिभिजन प्रमुख तथा श्रमिक शक्ति केन्द्रीय संयोजक मोतेलब सिकदरमाथि सोमबार बिहान करिब ११:४५ बजे खुलनाको सोनाडांगा क्षेत्रमा गोली हानिएको हो। गोली लागेपछि गम्भीर घाइते भएका सिकदरलाई तत्काल उद्धार गरी खुलना मेडिकल कलेज अस्पतालमा भर्ना गरिएको छ।

सोनाडांगा मोडेल प्रहरी चौकीका अनुसन्धान प्रमुख अनिमेष मण्डलका अनुसार सिकदरमाथि अज्ञात आक्रमणकारीहरूले गोली प्रहार गरेका हुन्। घटनापछि उक्त क्षेत्रमा ठूलो संख्यामा प्रहरी परिचालन गरिएको छ र अनुसन्धान जारी रहेको प्रहरीले जनाएको छ।

यसअघि, गत डिसेम्बर १२ मा विद्यार्थी आन्दोलनका प्रभावशाली युवा नेता शरीफ उस्मान हादीलाई ढाकाको एक मस्जिदबाट निस्कँदै गर्दा गोली हानिएको थियो। टाउकोमा गोली लागेर गम्भीर घाइते भएका हादीलाई उपचारका लागि डिसेम्बर १५ मा सिंगापुर लगिएको थियो। तर उपचारकै क्रममा डिसेम्बर १८ मा उनको निधन भयो।

हादीको मृत्युपछि राजधानी ढाकासहित देशका विभिन्न भागमा व्यापक विरोध प्रदर्शन, आगजनी र प्रहरीसँग झडपका घटनाहरू भएका थिए। यसले आमनिर्वाचनको तयारीमा रहेको बंगलादेशको राजनीतिक अवस्था कति संवेदनशील र नाजुक छ भन्ने स्पष्ट पारेको छ।

शरीफ उस्मान हादी गत वर्ष शेख हसिनाविरुद्ध भएको विद्यार्थी आन्दोलनका प्रमुख अनुहारमध्ये एक थिए। ‘इंकलाब मञ्च’ का प्रवक्ता तथा आयोजकमध्ये एकका रूपमा परिचित हादी शहरी युवामाझ अत्यन्त लोकप्रिय थिए। बेरोजगारी, भ्रष्टाचार र विदेशी प्रभावविरुद्धको उनको कडा अभिव्यक्तिले उनीलाई राष्ट्रिय राजनीतिमा उदीयमान नेताका रूपमा स्थापित गरेको थियो।

उनको हत्या र त्यसपछि भएको हिंसाले बंगलादेशी समाजभित्र गहिरो विभाजन उजागर गरेको छ। समर्थकहरूले उनलाई परिवर्तन र सुधारको प्रतीक मानिरहेका छन् भने आलोचकहरूले उनको राजनीतिक भूमिकाले कट्टरता बढाएको आरोप लगाएका छन्।

विश्लेषकहरूका अनुसार हादीको हत्या र पछिल्लो गोलीकाण्डले बंगलादेशमा राजनीतिक अस्थिरता अझ गहिरिने संकेत दिएको छ। साथै, भारत–बंगलादेश सम्बन्धमा पनि यस घटनाले नयाँ तनाव सिर्जना गर्न सक्ने आँकलन गरिएको छ।

समग्रमा, एकपछि अर्को भइरहेका यस्ता हिंसात्मक घटनाले बंगलादेश आगामी निर्वाचनतर्फ कस्तो मार्गमा अघि बढ्छ भन्ने प्रश्नलाई अझ गम्भीर बनाएको छ।