काठमाडौँ । अमेरिकी राष्ट्रपति ट्रम्पलेले इरानसँग भएको सम्झौताको पूर्ण पाठ केही दिनभित्रै सार्वजनिक गर्ने बताएका छन्। उनले आवश्यक औपचारिक प्रक्रिया पूरा भएपछि सम्झौताको सम्पूर्ण दस्तावेज पत्रकार सम्मेलनमार्फत शब्द–शब्द पढेर सुनाउन सक्ने संकेत समेत गरेका छन्।

फ्रान्समा आयोजित जी ७ शिखर सम्मेलनका क्रममा सञ्चारकर्मीसँग कुरा गर्दै ट्रम्पले सम्झौता सार्वजनिक गर्न आफूलाई कुनै समस्या नरहेको बताए। ‘पहिले आवश्यक औपचारिक वातावरण तयार होस् भन्ने चाहन्छु, त्यसपछि यसलाई सार्वजनिक गरिनेछ। यो एक उत्कृष्ट दस्तावेज हो,’ उनले भने।

ट्रम्पका अनुसार उक्त सम्झौतामा इरानले कहिल्यै परमाणु हतियार विकास नगर्ने प्रतिबद्धता समेटिएको छ। उनले सम्झौतामा आइतबार नै विद्युतीय हस्ताक्षर गरिसकेको दाबी गरेका छन्, तर यसको पूर्ण विवरण भने हालसम्म सार्वजनिक गरिएको छैन।

अमेरिकी संसद् (कंग्रेस) का सदस्यहरू तथा ट्रम्पसँगै रहेका केही विश्व नेताहरूले समेत सम्झौताको पूर्ण पाठ हेर्न नपाएको बताइएको छ। यद्यपि, ट्रम्पले दस्तावेज गोप्य राखिएको विषयलाई सामान्य प्रक्रिया भएको बताएका छन्।

‘म सम्भवतः पत्रकार सम्मेलन गर्नेछु र सम्झौताको प्रत्येक शब्द पढेर सुनाउनेछु, ताकि सञ्चारमाध्यमले यसलाई सही ढंगले प्रस्तुत गर्न सकून्। यो अत्यन्त महत्वपूर्ण दस्तावेज हो,’ ट्रम्पको भनाइ उद्धृत गर्दै सीएनएनले जनाएको छ।

उनले आगामी केही दिनभित्र सञ्चारमाध्यमसँग सम्झौताका विभिन्न पक्षबारे विस्तृत छलफल गर्ने पनि बताएका छन्।