विश्व फुटबलमा एउटा यस्तो नतिजा आयो, जसले लाखौं समर्थकलाई स्तब्ध बनाएको छ। पाँच पटकको विश्वकप विजेता ब्राजिललाई २–१ ले पराजित गर्दै नर्वे पहिलो पटक फिफा विश्वकपको क्वार्टरफाइनलमा प्रवेश गर्न सफल भएको हो। यो जित नर्वेको फुटबल इतिहासकै सबैभन्दा ठूलो उपलब्धिमध्ये एक मानिएको छ।
खेलको सुरुआतदेखि नै ब्राजिलले बलमाथि बढी नियन्त्रण राख्दै लगातार आक्रमण गरिरहेको थियो। विनिसियस जुनियर, मार्टिनेली र म्याथियस कुन्हाले नर्वेको रक्षापंक्तिमाथि निरन्तर दबाब बनाए। खेलको १३औँ मिनेटमा ब्राजिलले पेनाल्टीको अवसर पनि पाएको थियो, तर नर्वेका गोलरक्षक ओर्जान नाइल्यान्डले ब्रुनो गुइमाराएसको प्रहार उत्कृष्ट रूपमा बचाउँदै आफ्नो टोलीलाई ठूलो संकटबाट जोगाए। पहिलो हाफभर नाइल्यान्डले गरेका शानदार बचाउहरूले नर्वेलाई खेलमा टिकाइराख्यो।
दोस्रो हाफमा नर्वेका प्रशिक्षकले गरेका रणनीतिक परिवर्तन प्रभावकारी सावित भए। टोलीले प्रतिआक्रमणलाई तीव्र बनायो र त्यसको प्रतिफल ७९औँ मिनेटमा मिल्यो। आन्द्रियास स्केल्डेरुपको सटिक क्रसमा एर्लिङ हालान्डले शक्तिशाली हेडरमार्फत बललाई जाली चुमाउँदै नर्वेलाई १–० को अग्रता दिलाए। हालान्डको हेडर यति सशक्त थियो कि ब्राजिलका गोलरक्षक एलिसनसँग कुनै अवसर नै रहेन।
ब्राजिल बराबरी गोलको खोजीमा सम्पूर्ण शक्ति लगाएर अगाडि बढ्दा नर्वेले अर्को घातक प्रतिआक्रमण गर्यो। खेलको ९०औँ मिनेटमा फेरि स्केल्डेरुपकै पासमा हालान्डले बक्सबाहिरबाट उत्कृष्ट फिनिसिङ गर्दै दोस्रो गोल गरे। यो गोलले ब्राजिलका समर्थकलाई स्तब्ध बनायो र नर्वेको जित लगभग सुनिश्चित गरिदियो।
इन्जुरी समयको अन्तिमतिर ब्राजिलले पेनाल्टी पायो, जसलाई नेयमारले सहज रूपमा गोलमा परिणत गर्दै अन्तर २–१ मा झारे। तर बाँकी समय पर्याप्त नभएकाले ब्राजिल खेलमा फर्किन सकेन र पाँच पटकको विश्व च्याम्पियन अन्तिम १६ बाटै बाहिरियो।
नर्वेका लागि एर्लिङ हालान्ड नायक बने भने गोलरक्षक ओर्जान नाइल्यान्डले पनि असाधारण प्रदर्शन गर्दै धेरै निश्चित गोलका अवसर रोके। कप्तान मार्टिन ओडेगार्डले मिडफिल्डबाट खेललाई उत्कृष्ट रूपमा नियन्त्रण गरे र टोलीको सामूहिक प्रदर्शनले विश्व फुटबलमा नयाँ इतिहास रच्यो।
यता ब्राजिलले बलमाथि नियन्त्रण र अवसर दुवै सिर्जना गरे पनि फिनिसिङमा कमजोरी देखियो। विनिसियस जुनियर, मार्टिनेली र एन्ड्रिकले सिर्जना गरेका अवसरहरूलाई गोलमा परिणत गर्न नसक्दा टोलीले ठूलो मूल्य चुकाउनुपर्यो। पेनाल्टी बचाइनु र दोस्रो हाफमा रक्षात्मक गल्ती हुनु ब्राजिलको हारका मुख्य कारण बने।
यस ऐतिहासिक जितसँगै नर्वे पहिलो पटक विश्वकपको क्वार्टरफाइनलमा पुगेको छ। एर्लिङ हालान्डको दुई गोल र नाइल्यान्डको उत्कृष्ट गोलकिपिङले यो खेललाई सन् २०२६ विश्वकपकै सबैभन्दा अविस्मरणीय खेलमध्ये एक बनाएको छ।
प्रतिक्रिया
सम्बन्धित खबर
