काठमाडौं, असार ३१ — प्रतिनिधिसभाको बैठक दुई साताका लागि स्थगित हुने भएको छ। आजको बैठक सम्पन्न भएपछि अर्को बैठक साउन १४ गते बस्ने गरी कार्यतालिका तय गरिएको हो।

प्रतिनिधिसभा कार्यव्यवस्था परामर्श समितिको आज बसेको बैठकले साउन १४ गते अर्को बैठक बोलाउने विषयमा सहमति गरेको हो। यसबारे औपचारिक जानकारी भने सभामुखले आजकै बैठकको अन्त्यमा दिनेछन्।

कार्यव्यवस्था परामर्श समितिको बैठकका कारण बिहान ११ बजेका लागि तय गरिएको प्रतिनिधिसभाको बैठक दिउँसो १ बजे सुरु गरिएको थियो।

आजको बैठकमा प्रधानमन्त्रीको तर्फबाट कानुन, न्याय तथा संसदीय मामिला मन्त्री सोबिता गौतमले राष्ट्रिय मानव अधिकार आयोगको अठारौँ वार्षिक प्रतिवेदन सदनमा प्रस्तुत गर्ने कार्यसूची रहेको छ। साथै राष्ट्रिय सूचना आयोगको वार्षिक प्रतिवेदन र राष्ट्रिय समावेशी आयोगको सातौँ वार्षिक प्रतिवेदन पनि पेस गरिनेछ।

त्यसैगरी अर्थमन्त्री डा. स्वर्णिम वाग्लेले अर्थसम्बन्धी केही नेपाल कानुनलाई संशोधन तथा खारेज गर्ने विधेयकमाथि विचार गरियोस् भन्ने प्रस्ताव सदनमा प्रस्तुत गर्नेछन्।

बैठकमा विभिन्न अन्तर्राष्ट्रिय सन्धिमाथि छलफल तथा अनुमोदन गर्ने कार्यसूची पनि समावेश गरिएको छ। युवा, श्रम तथा रोजगारमन्त्री रामजी यादवले अन्तर्राष्ट्रिय श्रम संगठनका बाध्यकारी श्रमसम्बन्धी महासन्धि तथा श्रम निरीक्षणसम्बन्धी महासन्धि अनुमोदनका लागि प्रस्ताव प्रस्तुत गर्नेछन्।

आजको कार्यसूची सम्पन्न भएपछि प्रतिनिधिसभाको बैठक साउन १४ गतेसम्मका लागि स्थगित हुनेछ। यस अवधिमा संसदीय गतिविधि औपचारिक रूपमा अवरुद्ध रहने भए पनि संसदीय समितिहरूले भने आफ्नो नियमित कामलाई निरन्तरता दिनेछन्।