३ साउन, काठमाडौं। नेपाली बजारमा आइतबार सुनचाँदीको मूल्यमा पुनः वृद्धि भएको छ। अन्तर्राष्ट्रिय बजारको प्रभावसँगै स्थानीय बजारमा पनि सुन र चाँदी दुवैको भाउ बढेको हो।

नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला २ लाख ८४ हजार रुपैयाँ निर्धारण गरिएको छ। अघिल्लो कारोबार दिन सुनको मूल्य प्रतितोला २ लाख ८२ हजार १ सय रुपैयाँ रहेको थियो। यससँगै सुनको मूल्य एकै दिनमा १ हजार ९ सय रुपैयाँले बढेको हो।

त्यसैगरी चाँदीको मूल्य पनि प्रतितोला ४० रुपैयाँले वृद्धि भएको छ। अघिल्लो दिन प्रतितोला ४ हजार २ सय रुपैयाँ रहेको चाँदी आज ४ हजार २ सय ४० रुपैयाँमा कारोबार भइरहेको महासंघले जनाएको छ।

अन्तर्राष्ट्रिय बजारमा बहुमूल्य धातुको मूल्यमा आएको उतारचढावको प्रत्यक्ष प्रभाव नेपाली बजारमा पनि देखिएको व्यवसायीहरूको भनाइ छ। उनीहरूका अनुसार आगामी दिनमा अन्तर्राष्ट्रिय बजारको अवस्था अनुसार सुनचाँदीको मूल्यमा थप परिवर्तन हुन सक्ने सम्भावना रहेको छ।