काठमाडौं, १६ साउन ।
देशभर मनसुन प्रणाली सक्रिय रहेकाले काठमाडौं उपत्यकासहित अधिकांश जिल्लामा निरन्तर वर्षा भइरहेको छ। जल तथा मौसम विज्ञान विभागले आज पनि देशका विभिन्न स्थानमा भारीदेखि अति भारी वर्षाको सम्भावना रहेको भन्दै आवश्यक सतर्कता अपनाउन आग्रह गरेको छ।
विभागका अनुसार कोशी, बागमती, गण्डकी र लुम्बिनी प्रदेशका पहाडी क्षेत्रमा धेरै स्थानमा मध्यमदेखि भारी वर्षा हुने सम्भावना छ। विशेषगरी बागमती र गण्डकी प्रदेशका केही जिल्लामा पहिरो, बाढी तथा डुबानको जोखिम उल्लेखनीय रूपमा बढेको छ।
पछिल्लो २४ घण्टामा काठमाडौंको चन्द्रागिरि वर्षा मापन केन्द्रमा ९३.६ मिलिमिटर वर्षा रेकर्ड भएको विभागले जनाएको छ। निरन्तर वर्षाका कारण नदी तथा खोलानालाको जलस्तर बढ्न सक्ने भएकाले तटीय क्षेत्रका बासिन्दा, यात्रु तथा सवारी चालकलाई विशेष सावधानी अपनाउन आग्रह गरिएको छ।
मौसमविद्हरूले आगामी केही दिनसम्म मनसुनको प्रभाव कायम रहने सम्भावना रहेको जनाउँदै पहिरोको जोखिम भएका क्षेत्र, नदी किनार तथा डुबान हुन सक्ने स्थानमा उच्च सतर्कता अपनाउन सबैलाई अनुरोध गरेका छन्।
प्रतिक्रिया
सम्बन्धित खबर
