युक्रेनको राजधानी किभ तथा आसपासका क्षेत्रमा रुसले बुधबार रातभर गरेको भीषण क्षेप्यास्त्र आक्रमणमा कम्तीमा पाँच जनाको मृत्यु भएको छ भने २३ जना घाइते भएका छन्।

युक्रेनको राज्य आपत्कालीन सेवा (डीएसएनएस) का अनुसार आक्रमणका क्रममा आवासीय भवन, औद्योगिक क्षेत्र तथा गोदामहरूमा ठूलो क्षति पुगेको छ। भग्नावशेषमा फसेकाहरूको उद्धारका लागि उद्धार टोली परिचालन गरिएको छ। उद्धारकर्ताहरूले हालसम्म एक जनालाई जीवितै भग्नावशेषबाट बाहिर निकालेका छन्।

किभका मेयर भिटाली क्लिट्स्कोका अनुसार आक्रमणबाट एक बाल अस्पतालमा समेत क्षति पुगेको छ। अस्पतालका झ्यालहरू फुटेका छन् भने आसपास पार्किङ गरिएका धेरै सवारीसाधनमा आगलागी भएको छ। साथै, दक्षिणपश्चिमी किभको सोलोमियान्स्की जिल्लास्थित औद्योगिक क्षेत्र पनि मिसाइल आक्रमणको निशानामा परेको उनले बताएका छन्।

यता, किभ क्षेत्रका गभर्नर टिमुर ताकाचेन्कोका अनुसार ब्रोभरी जिल्लामा भएको अर्को आक्रमणमा एक जनाको मृत्यु भएको छ भने एक जना घाइते भएका छन्।

आक्रमणको जोखिमलाई ध्यानमा राख्दै स्थानीय प्रशासनले राति नै सर्वसाधारणलाई सुरक्षित स्थानमा जान आग्रह गरेको थियो। आवश्यक परे हवाई रक्षा प्रणाली सक्रिय रूपमा सञ्चालन गरिने पनि प्रशासनले जनाएको छ।

यसैबीच, युक्रेनमा जारी रुसको आक्रमणका कारण सुरक्षा अवस्था थप संवेदनशील बनेपछि पोल्यान्डको सेनाले पनि “सावधानीपूर्वक सैन्य हवाई कारबाही” सुरु गर्ने घोषणा गरेको छ।

रातभर युक्रेनका विभिन्न क्षेत्रमा क्षेप्यास्त्र आक्रमणको चेतावनी जारी गरिएको थियो भने उद्धार तथा क्षति मूल्याङ्कनको कार्य अझै जारी रहेको अधिकारीहरूले बताएका छन्।