काठमाडौं, २२ भदौ — नेपाल आयल निगमले बजारमा एलपी ग्यासको अभाव नरहेको दाबी गरे पनि पृथ्वी राजमार्गको कृष्णभीर खण्ड अवरुद्ध हुँदा काठमाडौं उपत्यकामा ग्यास आपूर्ति प्रभावित भएको छ।

भोटेकोशी–त्रिशूली क्षेत्रको बाढीका कारण पृथ्वी राजमार्गको कृष्णभीर खण्ड भासिएर बन्द भएपछि उपत्यकामा खाना पकाउने ग्यासको आपूर्ति चर्किएको हो। नेपाल ग्यास वितरक महासंघका वरिष्ठ उपाध्यक्ष विष्णुप्रसाद दुलालका अनुसार उपत्यकाको दैनिक ग्यास मागका तुलनामा आपूर्ति निकै कम छ।

“काठमाडौं उपत्यकाभित्रका बोटलिङ प्लान्टले पर्याप्त सिलिन्डर उपलब्ध गराउन सकिरहेका छैनन्। हामी सङ्घर्ष गरिरहेका छौं,” दुलालले भने।

निगमले तराईका उद्योगमा ग्यास भरेर वैकल्पिक मार्ग हुँदै काठमाडौं ल्याउने व्यवस्था गरेको छ। निगमका अनुसार बिहीबार २४ हजार ४९४, शुक्रबार ३४ हजार १३४ र शनिबार २९ हजार २४९ सिलिन्डर उपत्यका भित्रिएका छन्। तर, दैनिक मागका आधारमा यो आपूर्ति अपर्याप्त रहेको उपभोक्ता तथा व्यवसायीको भनाइ छ।

ग्यास नपाउँदा उपत्यकाका उपभोक्ताले सास्ती बेहोर्नुपरेको छ। इमाडोलका अमृत भुसालले पाँच दिनदेखि एउटा पनि सिलिन्डर पाउन नसकेको बताए। उनका अनुसार दुवै सिलिन्डर रित्तो छन्। ग्यास अभावकै कारण केही महिनाअघि विद्युतीय चुलो किने पनि विद्युत् पनि नियमित नभएकाले समस्या कायमै रहेको उनको भनाइ छ।

निगमले घरायसी उपभोक्तालाई प्राथमिकता दिने भन्दै काठमाडौंका होटल–रेस्टुरेन्टलगायत व्यावसायिक प्रयोगकर्तालाई ग्यास बिक्री रोकेको छ। त्यसले व्यावसायिक प्रयोगकर्ता थप प्रभावित भएका छन्। झम्सिखेलस्थित घाङ्ग्री क्याफेका सञ्चालक सुरोजराज राजकर्णिकारका अनुसार आफ्नो रेस्टुरेन्टमा दुईवटा मात्रै सिलिन्डर मौज्दात छ। बगैंचा रेस्टुरेन्टका एक अधिकारीले डिलरले नै आपूर्ति रोकेकाले केही दिन यस्तै भए व्यवसाय बन्द गर्नुपर्ने अवस्था आउन सक्ने बताए।

यसैबीच वैकल्पिक मार्गबाट ग्यास ढुवानी गर्नुपर्ने बाध्यताका कारण ग्यास उद्योगहरूले प्रतिसिलिन्डर १०० देखि १०५ रुपैयाँसम्म मूल्य बढाएका छन्। रित्तो सिलिन्डर साटेर भर्ने आधिकारिक मूल्य २ हजार ६० रुपैयाँ रहेको छ।

निगमले भने ग्यासको आयात र बिक्री–वितरण नियमित रहेको र बजारमा अभाव नरहेको दाबी गर्दै आएको छ। उपभोक्तालाई आवश्यकताअनुसार मात्र ग्यास किन्न र अनावश्यक भण्डारण नगर्न निगमले आग्रह गरेको छ। उपभोक्ता अधिकारकर्मीहरूले भने पर्याप्त मौज्दात हुँदा उपभोक्तालाई ग्यासका लागि लाइनमा उभिनुपर्ने अवस्था नआउने भन्दै निगमको दाबीप्रति प्रश्न उठाएका छन्।

कृष्णभीरको बाटो नखुलेसम्म काठमाडौं उपत्यकाको ग्यास आपूर्ति सहज नहुने वितरकहरूको भनाइ छ। निगमले सो खण्ड नखुलेसम्म तराईका उद्योगबाट वैकल्पिक मार्ग हुँदै ग्यास ल्याउने व्यवस्था जारी राख्ने जनाएको छ।