२९ माघ, मुम्बई । आईसीसी टी–२० विश्वकप २०२६ अन्तर्गत समूह चरणको आफ्नो दोस्रो खेलमा नेपालले आज इटलीसँग प्रतिस्पर्धा गर्दैछ। समूह ‘सी’ अन्तर्गतको यो खेल दिउँसो सवा ३ बजेदेखि मुम्बईस्थित वाङ्खेडे स्टेडियममा सुरु हुनेछ।

नेपाल र इटली दुवै टोली पहिलो खेलमा पराजित भएका कारण आजको खेल दुवैका लागि अत्यन्त महत्वपूर्ण बनेको छ। नेपाल पहिलो खेलमा इंग्ल्यान्डसँग पराजित भएको थियो भने इटली स्कटल्यान्डसँग हार व्यहोरेको थियो। त्यसैले आज दुवै टोली पहिलो जित दर्ता गर्ने लक्ष्यसहित मैदान उत्रनेछन्।

नेपाल र इटली १३ वर्षपछि पुनः आमनेसामने हुन लागेका हुन्। यसअघि सन् २०१३ मा आईसीसी डिभिजन–३ प्रतियोगिताअन्तर्गत ५० ओभरको खेलमा यी दुई टोली भिडेका थिए। तर टी–२० अन्तर्राष्ट्रिय फर्म्याटमा भने यो उनीहरूबीचको पहिलो भेट हुनेछ।

विश्वकपमा नेपालले सन् २०१४ मा अफगानिस्तानविरुद्ध जित हात पारेपछि अहिलेसम्म जित निकाल्न सकेको छैन। त्यसैले १२ वर्षपछि विश्वकपमा पुनः जित हासिल गर्ने अवसरका रूपमा पनि आजको खेललाई हेरिएको छ।

समूह ‘सी’ मा हाल वेस्ट इन्डिजले लगातार दुई जितसहित ४ अंक जोडेर शीर्ष स्थानमा छ। इंग्ल्यान्ड र स्कटल्यान्डले २–२ अंक जोडेका छन्। यस्तो अवस्थामा नेपालका लागि सेमिफाइनल यात्राको सम्भावना कायम राख्न आजको खेल निर्णायक बन्नेछ।

(तस्वीर ChatGPT द्वारा तयार गरिएको)