३० चैत, काठमाडौं । अमेरिकी राष्ट्रपति डोनाल्ड ट्रम्पले चीनलाई इरानलाई कुनै पनि प्रकारको सैन्य सहयोग नगर्न कडा चेतावनी दिएका छन्। आइतबार दिएको एक अन्तर्वार्तामा उनले चीनले इरानलाई सहयोग गरेको पुष्टि भएमा त्यसविरुद्ध ५० प्रतिशतसम्म भन्सार शुल्क लगाउने बताएका हुन्।

ट्रम्पका अनुसार बेलायतसहित केही देशहरूले होर्मुज स्ट्रेटमा रहेका बारुदी सुरुङ हटाउन आफ्ना नौसैनिक जहाजहरू पठाउने तयारी गरिरहेका छन्। यसैबीच, उनले  नेटो प्रति असन्तुष्टि व्यक्त गर्दै आवश्यक समयमा संगठनले अमेरिकालाई अपेक्षित सहयोग नगरेको गुनासो गरेका छन्। उनले अमेरिकाले ठूलो आर्थिक योगदान गरे पनि त्यसअनुसार समर्थन नपाएको बताए।

ट्रम्पले इरानविरुद्ध कारबाहीका लागि अमेरिका पूर्ण रूपमा तयार रहेको संकेत दिएका छन्। आफ्नो सामाजिक सञ्जालमा ‘लक्ड एन्ड लोडेड’ भन्दै उनले उपयुक्त समय आएपछि सैन्य कदम चाल्न सकिने बताएका छन्।

यसअघि पनि उनले इरानलाई होर्मुज स्ट्रेटबाट गुज्रिने जहाजहरू रोकिन सक्ने चेतावनी दिएका थिए। उता, Iranले भने उक्त जलमार्ग आफ्नो नियन्त्रणमा रहेको दाबी गर्दै त्यहाँबाट जाने जहाजहरूले आफ्नो मुद्रा रियालमा शुल्क तिर्नुपर्ने बताएको छ।

युद्धविराम जारी, तर तनाव कायमै

हाल अमेरिका र इरानबीच युद्धविराम कायम रहेको ट्रम्पले बताएका छन्। तर, उनले सोमबार बिहानदेखि इरानविरुद्ध नौसैनिक नाकाबन्दी लागू हुने जानकारी दिएका छन्। अमेरिकी सेन्ट्रल कमाण्डका अनुसार इरानका बन्दरगाहतर्फ आउने-जाने जहाजहरू निगरानीमा राखिनेछन्।

ट्रम्पले इरानलाई अझै वार्तामा फर्किने अवसर रहेको बताएका छन्। उनले इरान दबाबमा रहेको दाबी गर्दै फर्किए राम्रो, नफर्किए पनि अमेरिका तयार रहेको स्पष्ट पारे।

अन्तर्राष्ट्रिय सञ्चारमाध्यमहरूको रिपोर्टअनुसार वार्ता असफल भएपछि अमेरिकाले पुनः हवाई आक्रमणको विकल्पसमेत विचार गरिरहेको छ। ह्वाइट हाउसले सबै विकल्प खुला रहेको जनाएको छ।

एसियाली बजारमा प्रभाव

अमेरिकी नाकाबन्दी घोषणापछि एसियाली शेयर बजारमा गिरावट देखिएको छ। जापानको निक्केई २२५, टोपिक्स र दक्षिण कोरियाको कोस्पी सूचकांकमा गिरावट आएको छ। विशेषगरी होर्मुज स्ट्रेटमार्फत हुने तेल आपूर्तिमा असर पर्न सक्ने चिन्ताले लगानीकर्ताहरू सतर्क भएका छन्।