रेमिट्यान्स आप्रवाहमा २७.२ प्रतिशतको उछाल, तीन महिनामै भित्रियो ७ खर्ब ३ अर्ब रुपैयाँ

काठमाडौँ, ४ मङ्सिर २०८३ (शुक्रबार) ।
चालु आर्थिक वर्ष २०८३/८४ को पहिलो तीन महिना (असोज मसान्त) सम्ममा नेपाल भित्रिने विप्रेषण (रेमिट्यान्स) आप्रवाहमा उल्लेखनीय वृद्धि भएको छ । नेपाल राष्ट्र बैङ्कले सार्वजनिक गरेको पछिल्लो तथ्याङ्कअनुसार, यस अवधिमा रेमिट्यान्स २७.२ प्रतिशतले वृद्धि भई ७ खर्ब ३ अर्ब ७० करोड रुपैयाँ पुगेको छ । अमेरिकी डलरमा समेत रेमिट्यान्स आप्रवाह १६.७ प्रतिशतले बढेर ४ अर्ब ६० करोड डलर पुगेको छ ।

चाडपर्वको समय भएकाले असोज महिनामा मात्रै २ खर्ब ६७ अर्ब ३४ करोड रुपैयाँ बराबरको रेमिट्यान्स भित्रिएको छ, जुन हालसम्मकै उच्च मासिक कीर्तिमान हो । यसअघि वैशाख महिनामा २ खर्ब ५७ अर्ब रुपैयाँ भित्रिएको कीर्तिमान रहेको थियो ।

श्रम स्वीकृति र पुनः श्रम स्वीकृतिमा निरन्तरता
रेमिट्यान्स आप्रवाहमा आएको यो वृद्धिसँगै वैदेशिक रोजगारीका लागि बाहिरिने नेपालीहरूको सङ्ख्या पनि उल्लेख्य रहेको छ । चालु आर्थिक वर्षको पहिलो तीन महिनामा वैदेशिक रोजगारीका लागि १ लाख २१ हजार ८ सय ७९ जनाले नयाँ (अन्तिम) श्रम स्वीकृति लिएका छन् । त्यस्तै, सोही अवधिमा ८२ हजार ३ सय ६९ जनाले वैदेशिक रोजगारीका लागि पुनः श्रम स्वीकृति (नवीकरण) लिएका छन् ।

अर्थविद्हरूका अनुसार वैदेशिक रोजगारीमा जाने युवाहरूको निरन्तरता र औपचारिक माध्यमबाट रकम पठाउने प्रवृत्ति बढेका कारण रेमिट्यान्स आप्रवाहमा यो सुधार देखिएको हो । यद्यपि, अर्थतन्त्र पूर्ण रूपमा रेमिट्यान्समा निर्भर हुँदै गएकाले आन्तरिक उत्पादन र स्वदेशमै रोजगारी प्रवर्द्धनमा समेत ध्यान दिनुपर्ने आवश्यकता औँल्याइएको छ ।

प्रतिक्रिया
सम्बन्धित खबर