सेनेगलले तनावपूर्ण र विवादले भरिएको फाइनल खेलमा आयोजक मोरक्कोलाई पराजित गर्दै दोस्रो पटक अफ्रिका कप अफ नेसन्सको उपाधि जितेको छ। अतिरिक्त समयमा आएको निर्णायक गोलसँगै सेनेगलले अफ्रिकी फुटबलको सबैभन्दा प्रतिष्ठित ट्रफी पुनः आफ्नो नाममा लेखायो।
निर्धारित ९० मिनेटसम्म खेल गोलरहित बराबरीमा सकिएको थियो। ९८औँ मिनेटमा भिडियो असिस्टेन्ट रेफ्री (VAR) को सल्लाहमा रेफ्री जीन ज्याक एनडालाले मोरक्कोलाई पेनाल्टी दिएपछि खेलमा ठूलो विवाद सुरु भयो। सेनेगलका डिफेन्डरले ब्राहिम डियाजलाई फाउल गरेको ठहर गर्दै उक्त निर्णय गरिएको थियो।
यसअघि नै सेनेगलको एक गोल अमान्य घोषित भएपछि प्रशिक्षक पप थियाव असन्तुष्ट थिए। पेनाल्टीको निर्णयपछि आक्रोशित बनेका उनले खेलाडीहरूलाई मैदान छाड्न निर्देशन दिए। करिब १७ मिनेटसम्म खेल अन्योलमा रह्यो।
तर, कप्तान साडियो मानेले खेलाडीहरूलाई सम्झाउँदै मैदान फर्कन आग्रह गरे। उनको पहलपछि सेनेगलका खेलाडीहरू पुनः मैदानमा फर्किए। पेनाल्टी प्रहारमा ब्राहिम डियाज असफल भए, जसलाई गोलकिपर एडुआर्ड मेन्डीले सजिलै रोके।
त्यसपछि अतिरिक्त समयको चौथो मिनेटमा पापे गुयले गरेको गोल नै निर्णायक बन्यो। सो गोलसँगै सेनेगलले पछिल्लो पाँच वर्षमा दोस्रो पटक अफ्रिका कप अफ नेसन्सको उपाधि जित्यो।
खेलपछि मोरक्कोका प्रशिक्षक वालिद रेग्रागुईले सेनेगलको मैदान त्याग्ने कदमलाई ‘लज्जास्पद’ भनेका थिए। उता, सेनेगलका प्रशिक्षक थियावले आफ्नो व्यवहारप्रति माफी माग्दै आवेशमा निर्णय गरेको स्वीकार गरे।
साडियो मानेले खेलपछि भने,
“हामीले फुटबलको राम्रो छवि देखाउनुपर्छ। निर्णय मन नपरे पनि मैदान छाड्नु सही होइन। म हार्न तयार छु, तर फुटबलको बेइज्जत भएको हेर्न चाहन्न।”
गोलकिपर एडुआर्ड मेन्डीले पनि टोलीको एकता र मानेको नेतृत्वकै कारण जित सम्भव भएको बताए।
विवादका बीच पनि सेनेगलको यो ऐतिहासिक जितले अफ्रिकी फुटबलमा उनीहरूको प्रभुत्व पुनः प्रमाणित गरेको छ।
प्रतिक्रिया
सम्बन्धित खबर
