काठमाडौं । जापानको तल्लो सदन निर्वाचनमा सानाए ताकाइची नेतृत्वको सत्तारूढ लिबरल डेमोक्रेटिक पार्टी (एलडीपी) ले अत्यधिक बहुमत हासिल गरेको छ। आइतबार सम्पन्न निर्वाचनमा एलडीपीले संसदको शक्तिशाली तल्लो सदनमा स्पष्ट जित दर्ता गर्दै सरकार गठनका लागि बलियो जनादेश प्राप्त गरेको हो।

सरकारी प्रसारक एनएचकेका अनुसार ४६५ सदस्यीय तल्लो सदनमा एलडीपीले ३१६ सिट जितेको छ। यो संख्या साधारण बहुमतका लागि आवश्यक २३३ सिटभन्दा ८३ सिट बढी हो, जसले ताकाइची नेतृत्वको सरकारलाई नीति निर्माण र कानुन निर्माणमा सहज अवस्था सिर्जना गरेको छ।

निर्वाचन परिणाम सार्वजनिक भएपछि पत्रकारहरूसँग कुरा गर्दै प्रधानमन्त्री ताकाइचीले जिम्मेवार र सक्रिय वित्तीय नीतिमा निरन्तर जोड दिइने बताइन्। उनले भनिन्, “हामी वित्तीय नीतिको दिगोपनलाई प्राथमिकता दिँदै आवश्यक लगानी सुनिश्चित गर्नेछौं।”

‘आइरन लेडी’ ताकाइची

पूर्व टेलिभिजन प्रस्तोता समेत रहेकी ६४ वर्षीया सानाए ताकाइची जापानको दक्षिणपन्थी राजनीतिमा प्रभावशाली व्यक्तित्वका रूपमा चिनिन्छिन्। पूर्व ब्रिटिश प्रधानमन्त्री मार्गरेट थ्याचरप्रतिको प्रशंसाका कारण उनलाई ‘आइरन लेडी’ उपनामले समेत चिनिने गरिन्छ।
लैङ्गिक समानता र आप्रवासन नीतिमा उनका विचार रूढिवादी मानिन्छन्।

पूर्व प्रधानमन्त्री शिन्जो आबेकी निकट सहयोगी मानिने ताकाइचीले आफ्नो राजनीतिक यात्रामा विभिन्न मन्त्री पद सम्हालिसकेकी छन्। उनी पाँच वर्षको अवधिमा जापानकी चौथी प्रधानमन्त्री हुन्, जसले विगतका राजनीतिक अस्थिरता र नेतृत्व परिवर्तनको क्रमलाई अन्त्य गर्ने अपेक्षा गरिएको छ।

राजनीतिमा आउनुअघि उनी केही समय टेलिभिजन प्रस्तोता (होस्ट) का रूपमा समेत सक्रिय थिइन्। हेभी मेटल संगीतप्रति रुचि राख्ने उनी एक समय ब्याण्डसँग आबद्ध पनि थिइन्।

अर्थतन्त्र र चुनावी प्रतिबद्धता

हालका वर्षहरूमा एलडीपी चन्दा र धार्मिक काण्डका कारण आलोचनामा रहे पनि, ताकाइचीले बढ्दो महँगीबाट जनतालाई राहत दिन खाद्यान्नमा लाग्ने आठ प्रतिशत बिक्री कर निलम्बन गर्ने चुनावी प्रतिबद्धता अघि सारेकी थिइन्। यद्यपि, विश्वका विकसित अर्थतन्त्रहरूमध्ये सबैभन्दा ठूलो सार्वजनिक ऋण बोकेको जापानले यस्तो कार्यक्रम कसरी वित्तपोषण गर्छ भन्ने प्रश्न भने अझै कायम छ।

अन्तर्राष्ट्रिय प्रतिक्रिया

निर्वाचन जितपछि अमेरिकी राष्ट्रपति डोनाल्ड ट्रम्पले सामाजिक सञ्जालमार्फत ताकाइचीलाई बधाई दिँदै ‘पूर्ण समर्थन’ जनाएका छन्। अमेरिकी अर्थमन्त्री स्कट बेसेन्टले पनि यसलाई ‘ठूलो जित’ भन्दै प्रशंसा गरेका छन्।

तर, यस निर्वाचन परिणामले चीनसँगको कूटनीतिक सम्बन्धमा थप तनाव सिर्जना गर्ने संकेत देखिएको छ। विश्लेषकहरूका अनुसार ताइवान र क्षेत्रीय सुरक्षासम्बन्धी ताकाइचीका स्पष्ट अभिव्यक्तिले बेइजिङ असहज बन्ने सम्भावना छ।

कानुन निर्माणमा बलियो हैसियत

होसेई विश्वविद्यालयका प्राध्यापक क्रेग मार्कका अनुसार तल्लो सदनमा प्राप्त स्पष्ट बहुमतले एलडीपीलाई विपक्षीको ठूलो अवरोधबिना कानुन पारित गर्न सक्षम बनाएको छ।
उनका अनुसार रक्षा खर्चदेखि बजेटसम्मका विषयमा ताकाइचीले चाहेको नीति अघि बढाउने अवसर यही बहुमतले दिएको हो।

जापानको प्रमुख व्यावसायिक महासंघ केइदानरेनले पनि निर्वाचन परिणामलाई स्वागत गर्दै यसले देशमा राजनीतिक स्थिरता फर्काएको जनाएको छ।