भारत र श्रीलंकामा जारी टि–२० विश्वकप अन्तर्गत समूह ‘सी’ को महत्वपूर्ण खेलमा नेपालले वेस्ट इन्डिजविरुद्ध टस हारेर पहिला ब्याटिङ गर्ने भएको छ। आइतबार मुम्बईस्थित वानखडे क्रिकेट रगंशालामा भएको टसमा वेस्ट इन्डिजले जित हात पार्दै नेपाललाई ब्याटिङको निम्तो दिएको हो।

आजको खेल नेपालका लागि ‘गर या मर’को अवस्थामा रहेको छ। अघिल्ला दुई खेलमा पराजित भएको नेपाल सेमिफाइनल सम्भावना कायम राख्न जित्नै पर्ने दबाबमा मैदान उत्रिएको छ।

नेपालले पहिलो खेलमा इंग्ल्यान्ड राष्ट्रिय क्रिकेट टोलीसँग ४ रनको झिनो अन्तरले हार व्यहोरेको थियो भने दोस्रो खेलमा इटाली राष्ट्रिय क्रिकेट टोलीसँग १० विकेटको फराकिलो पराजय भोगेको थियो। लगातार दुई हारपछि अंकविहीन बनेको नेपाल आज पुनरागमनको लक्ष्यसहित मैदानमा उत्रिएको छ।

वेस्ट इन्डिजजस्तो सशक्त टोलीविरुद्ध प्रतिस्पर्धा गर्न नेपालका ब्याट्सम्यानले जिम्मेवार प्रदर्शन गर्नुपर्नेछ। सुरुआती ओभरहरूमा राम्रो सुरुवात गर्न सके मात्र प्रतिस्पर्धात्मक लक्ष्य प्रस्तुत गर्न सकिनेछ।

समूह ‘सी’ मा अंक तालिका सन्तुलित अवस्थामा रहेकाले आजको खेलले नेपालको आगामी यात्रामा निर्णायक प्रभाव पार्नेछ। नेपाली समर्थकहरू जितको आशासहित टोलीलाई उत्साह दिइरहेका छन्।