काठमाडौं, ११ फागुन। पोखराबाट काठमाडौं आउँदै गरेको यात्रु बस धादिङमा दुर्घटनाग्रस्त हुँदा ६ महिला र ११ पुरुष गरी १७ जनाको दुःखद निधन भएको पुष्टि भएको छ। दुर्घटनामा परेका २७ जनाको सकुशल उद्धार गरी विभिन्न अस्पतालमा उपचारका लागि पठाइएको छ।
धादिङ जिल्लाका प्रमुख जिल्ला अधिकारी विजयराज सुवेदीका अनुसार मृतक तथा घाइतेहरूको परिचय खुल्ने क्रम जारी छ। दुर्घटनामा एक जना न्युजिल्याण्डका नागरिकसमेत परेका छन्।
पृथ्वी राजमार्ग अन्तर्गत पोखराबाट काठमाडौंका लागि छुटेको ग१ख १४२१ नम्बरको बस राति करिब १ बजेतिर धादिङको बेनिघाट रोराङ गाउँपालिका–५ भैंसेगौडा नजिकैबाट करिब ३ सय मिटर तल त्रिशूली नदी किनारमा खसेको थियो। बस क्षतविक्षत अवस्थामा फेला परेको थियो।
उद्धारकार्य चुनौतीपूर्ण परिस्थितिमा सम्पन्न गरिएको थियो। रातिको समय, दुर्गम भूभाग तथा उद्धार सामग्रीको अभावका बाबजुद सुरक्षाकर्मीहरूले टर्चको सहायताले घाइतेहरूको उद्धार गरेका थिए। घटनास्थलबाट डुंगामार्फत करिब एक किलोमिटर तलसम्म यात्रुहरूलाई पुर्याएर, त्यहाँबाट सडकसम्म उकालो चढाई एम्बुलेन्समार्फत अस्पताल पठाइएको थियो।
घटनास्थलमा नेपाली सेना, नेपाल प्रहरी तथा सशस्त्र प्रहरी बलका टोलीहरू खटिएका थिए। सशस्त्र प्रहरी बलको विपद् व्यवस्थापन बेस आदमघाटबाट डीएसपी सुनिल गिरी नेतृत्वको टोली तथा विपद् व्यवस्थापन तालिम शिक्षालय कुरिनटारबाट गोताखोरसहितको विशेष टोली उद्धारमा संलग्न भएको थियो।
दुर्घटनाको कारणबारे अनुसन्धान भइरहेको प्रशासनले जनाएको छ।
(तस्बिर स्रोत: फेसबुक)
प्रतिक्रिया
सम्बन्धित खबर
