११ असोज, काठमाडौं ।
लगातारको भारी वर्षाले देशका विभिन्न भागमा ठूलो क्षति पुर्याएको छ। असोज ९ देखि ११ सम्म देशभर भारी वर्षा हुने र बाढी–पहिरोको उच्च जोखिम रहने पूर्वानुमान पहिल्यै गरिएको थियो। त्यो पूर्वानुमानअनुसार नै नदीहरूमा बाढी आएको छ, प्रमुख राजमार्गहरू पहिरोले पुरिएका छन् र सयौँ घर डुबानमा परेका छन्।
उर्लिएका नदी, बगेका पुल
कालीगण्डकीको बाढीले पर्वतमा ठूलो क्षति पुर्याएको छ। मिर्मी–हर्मिचौर जोड्ने सवारी पुल बगेको छ भने सेतीबेनी बजार डुबानमा परेको छ। रिडीमा करिब दुई दर्जन घर डुबेका छन्। कालीगण्डकीको बाढीले एउटा पहुँचमार्ग पनि बगाएपछि नवलपुर र तनहुँ जोड्ने मुख्य सडक सम्पर्क टुटेको छ।
नारायणीको बहाव खतराको तह नाघेपछि तटीय क्षेत्रका बासिन्दालाई उच्च सतर्कता अपनाउन आग्रह गरिएको छ। पानीको बहाव बढेपछि गण्डक ब्यारेजका सबै ढोका खोलिएका छन्। बुटवलमा तिनाउको बाढीले दुई घर बगाएको छ भने तीन घरमा क्षति पुगेको छ। सप्तरीमा करिब ५०० घर डुबानमा परेका छन्।
पहिरोले राजमार्ग ठप्प
पहिरोका कारण प्रमुख राजमार्गहरूमा यातायात अवरुद्ध छ:
– मुग्लिन–नारायणगढ सडकखण्ड ठाउँठाउँमा पहिरो खसेर बन्द छ।
– पृथ्वी राजमार्गको कृष्णभिर र तिङ्ग्राङखानीमा सडक पुरिएको छ।
– सिद्धार्थ राजमार्गको वालिङ खण्ड अवरुद्ध छ।
– कान्तिलोकपथमा दुई ठाउँमा पहिरो खसेको छ।
– कर्णालीका प्रमुख राजमार्गहरू पनि ठाउँठाउँमा बन्द छन्।
पाल्पामा पहिरोमा परी दुई जनाको मृत्यु भएको छ भने तीन जना बेपत्ता छन्। हुम्लाको सिमिकोटमा अहिलेसम्मकै धेरै वर्षा भएको छ।
सरकारको परीक्षा
राजमार्ग बन्द हुँदा यात्रु अलपत्र परेका छन् भने सामान ढुवानी पनि प्रभावित भएको छ। दसैँ नजिकिँदै गर्दा बजार र यात्रामा यसको असर अझ बढ्न सक्ने देखिन्छ। बेपत्ता भएकाको खोजी र उद्धार, विस्थापितलाई राहत र पुनर्वास, अनि बन्द सडक छिटो खुलाउने काममा सरकार कति छिटो र प्रभावकारी हुन्छ भन्नेमा उसको विपद् व्यवस्थापनको परीक्षा हुँदैछ। मौसम पूर्वानुमानअनुसार वर्षा अझै केही दिन जारी रहन सक्ने भएकाले जोखिम क्षेत्रका बासिन्दालाई सतर्क रहन आग्रह गरिएको छ।
प्रतिक्रिया
सम्बन्धित खबर
