काठमाडौँ, वैशाख ३१ गते । देशभर पश्चिमी न्यूनचापीय प्रणाली, स्थानीय वायु तथा तल्लो वायुमण्डलमा बनेको न्यून चापीय क्षेत्रको प्रभाव कायम रहेकाले आज विभिन्न प्रदेशमा वर्षाको सम्भावना रहेको जल तथा मौसम पूर्वानुमान महाशाखाले जनाएको छ।
महाशाखाका अनुसार हाल कोशी, मधेश, बागमती, गण्डकी र लुम्बिनी प्रदेशसहित देशका हिमाली तथा पहाडी क्षेत्रमा सामान्यदेखि पूर्ण बदलीको अवस्था रहेको छ भने अन्य क्षेत्रमा आंशिक बदली देखिएको छ। कोशी र बागमती प्रदेशका केही स्थान तथा गण्डकी र लुम्बिनी प्रदेशका केही क्षेत्रमा अहिले मध्यम वर्षा भइरहेको छ।
आज बिहीबार दिउँसो कोशी, बागमती र गण्डकी प्रदेशका अधिकांश हिमाली तथा पहाडी क्षेत्रमा सामान्य बदली रहनेछ। साथै अन्य हिमाली तथा पहाडी भूभागमा पनि आंशिकदेखि सामान्य बदली रहने मौसमविद्ले बताएका छन्।
कोशी प्रदेशका केही स्थान तथा बागमती र गण्डकी प्रदेशका हिमाली तथा पहाडी क्षेत्रमा मेघगर्जन र चट्याङसहित मध्यम वर्षाको सम्भावना रहेको छ। त्यसैगरी मधेश, बागमती, गण्डकी र लुम्बिनी प्रदेशका तराईका केही स्थानमा पनि वर्षा हुन सक्ने अनुमान गरिएको छ। उच्च हिमाली क्षेत्रमा हल्का हिमपातको सम्भावना समेत रहेको महाशाखाले जनाएको छ।
आज राति पनि मौसम पूर्ण रूपमा सुधार नहुने देखिएको छ। कोशी, मधेश, बागमती र गण्डकी प्रदेशलगायत हिमाली क्षेत्रमा सामान्य बदली रहनेछ भने अन्य क्षेत्रमा आंशिक बदली कायम रहने पूर्वानुमान गरिएको छ।
रातिको समयमा कोशी र मधेश प्रदेशका केही स्थान तथा बागमती, गण्डकी र कर्णाली प्रदेशका हिमाली तथा पहाडी क्षेत्रमा मेघगर्जन, चट्याङसहित मध्यम वर्षा तथा हिमपात हुन सक्ने भएकाले आवश्यक सतर्कता अपनाउन महाशाखाले आग्रह गरेको छ।
प्रतिक्रिया
सम्बन्धित खबर
