न्यूयोर्क : युद्धविराम कायम रहेकै अवस्थामा अमेरिकाले दक्षिणी इरानमा पुनः सैन्य आक्रमण गरेको जनाएको छ। अमेरिकी सेन्ट्रल कमान्ड (सेन्टकम) ले जारी गरेको वक्तव्यअनुसार अमेरिकी सैनिकमाथि सम्भावित खतरा रोक्न तथा आत्मरक्षाका लागि उक्त कारबाही गरिएको हो।

सेन्टकमका प्रवक्ता क्याप्टेन टिम हकिन्सका अनुसार आक्रमण इरानको दक्षिणी बन्दरगाह सहर बन्दर अब्बास नजिक गरिएको थियो। स्ट्रेट अफ होर्मुज क्षेत्रमा अवस्थित यो सहर इरानी नौसैनिक गतिविधिको प्रमुख केन्द्र मानिन्छ। अन्तर्राष्ट्रिय सञ्चारमाध्यमहरूले जनाएअनुसार अमेरिकी सेनाले इरानी मिसाइल स्थल तथा समुद्रमा माइन बिछ्याउन प्रयोग भइरहेका डुंगालाई निशाना बनाएको थियो।

यसअघि इरानी सरकारी सञ्चारमाध्यमहरूले बन्दर अब्बास क्षेत्रमा विस्फोटको आवाज सुनिएको र स्थानीय अधिकारीहरूले घटनाबारे अनुसन्धान गरिरहेको बताएका थिए। यद्यपि, इरानले अमेरिकी आक्रमणबारे हालसम्म औपचारिक प्रतिक्रिया दिएको छैन।

युद्धविराम लागू भएयता पनि अमेरिका र इरानबीच पटक–पटक सैन्य तनाव देखिँदै आएको छ। अमेरिकी पक्षले भने जारी युद्धविरामको सम्मान गर्दै आफ्ना सैनिकको सुरक्षालाई प्राथमिकता दिएको दाबी गरेको छ।

यस घटनाले अमेरिका–इरानबीच सम्भावित शान्ति सम्झौतामा असर पार्न सक्ने अनुमान गरिएको छ। हमलापछि अमेरिकी विदेशमन्त्री Marco Rubio ले अझै पनि सम्झौताको सम्भावना कायम रहेको बताएका छन्। उनका अनुसार इरानका विदेशमन्त्री तथा प्रमुख वार्ताकार र कतारका प्रधानमन्त्रीबीच मंगलबार वार्ता हुने तयारी छ। उनले अमेरिकी राष्ट्रपति Donald Trump सम्झौताका लागि सकारात्मक रहेको पनि बताएका छन्।

चर्चामा रहेको प्रस्तावित समझदारीपत्रमा ६० दिनका लागि युद्धविराम थप गर्ने, स्ट्रेट अफ होर्मुज पुनः खुला गर्ने तथा इरानको आणविक कार्यक्रमबारे थप वार्ता अघि बढाउने विषय समेटिएको बताइएको छ। तर अमेरिकी सञ्चारमाध्यमहरूका अनुसार तत्काल अन्तिम सम्झौता हुने सम्भावना कम देखिएको छ।

इरानमाथिको प्रतिबन्ध हटाउने, रोक्का गरिएका इरानी सम्पत्ति फुकुवा गर्ने तथा इरानको आणविक गतिविधिमा सीमितता लगाउने अमेरिकी मागजस्ता संवेदनशील विषयमा आगामी चरणमा थप छलफल हुने जनाइएको छ।

अमेरिका र इरानबीच गत ८ अप्रिलदेखि युद्धविराम लागू भए पनि स्ट्रेट अफ होर्मुज क्षेत्रमा तनाव कायमै छ। इरानले जलमार्गमा आफ्नो नियन्त्रण कायम राखेको छ भने अमेरिकी नौसेनाले इरानी बन्दरगाहहरूमा दबाब बढाइरहेको बताइएको छ।

गत फेब्रुअरी २८ मा अमेरिका र इजरायलले इरानमाथि व्यापक हमला गरेपछि मध्यपूर्व क्षेत्रको सुरक्षा अवस्था थप संवेदनशील बनेको छ।