काठमाडौं — नेपाल पञ्चाङ्ग निर्णायक विकास समितिले यस वर्षको भाइटीकाको उत्तम साइत सार्वजनिक गरेको छ। समितिका अध्यक्ष प्रा. शम्भुप्रसाद ढकालका अनुसार, कात्तिक ६ गते बिहीबार बिहान ११:३९ बजे भाइटीका लगाउने उत्तम साइत रहेको छ।
समितिका सदस्य प्रा. देवमणि भट्टराईका अनुसार, उक्त समयमा धनु लग्न, कन्या नवमांश, चर बेला, अभिजित योग र विजय मुहूर्तको शुभ संयोग रहने भएकाले यो साइत विशेष शुभ मानिएको हो।
‘राज्य सञ्चालकहरूका लागि साइतमै टीका लगाउने परम्परा भए पनि सर्वसाधारणले मध्याह्नकालमै टीका लगाउन कुनै समस्या हुँदैन,’ प्रा. भट्टराईले भने।
यस वर्षको यमपञ्चक पर्व कात्तिक १ गते शनिबारदेखि सुरू भएको हो।
-
कात्तिक २ गते आइतबार काग तिहार तथा धनवन्तरी जयन्ती मनाइयो।
-
कात्तिक ३ गते सोमबार नरक स्नान, कुकुर तिहार र बेलुकी लक्ष्मीपूजा भयो।
-
कात्तिक ५ गते बुधबार गाई, गोरू र आत्म (म्ह) पूजा पर्दछ।
-
र अन्तिम दिन कात्तिक ६ गते बिहीबार, भाइटीका तथा नेवार समुदायको किजा पूजा मनाइनेछ।
यसरी, दिदीबहिनीले आफ्ना दाजुभाइको दीर्घायु र सुखसमृद्धिका लागि टीका लगाउने भाइटीका पर्वको शुभ साइत यस वर्ष बिहान ११:३९ बजे निर्धारित गरिएको छ।
