मौसमविद्का अनुसार चक्रवात कमजोर भइसके पनि त्यसको प्रभाव नेपालमा कायमै रहेकाले शुक्रबार देशका अधिकांश भूभागमा बादल लाग्ने, हल्कादेखि मध्यम वर्षा हुने तथा केही स्थानमा भारी वर्षा र हिमपात हुन सक्नेछ। शनिबारदेखि भने मौसम प्रणाली क्रमशः कमजोर हुँदै जाने अनुमान छ।

नेपाल मौसम विज्ञान विभागका प्रवक्ता विभूति पोखरेलले चक्रवात ‘अर्नब’ कमजोर भए पनि त्यसको प्रभावका कारण नेपालमा वर्षा, हिमपात र हावाहुरीको सम्भावना रहेकाले सतर्क रहन आग्रह गरेकी छन्।

त्रिभुवन विश्वविद्यालयको जल तथा मौसम केन्द्रीय विभागका सहप्राध्यापक डा. विनोद पोखरेलका अनुसार शुक्रबार अपराह्नदेखि रातिसम्म कोशी र बागमती प्रदेशका धेरै स्थानमा भारी वर्षा हुन सक्ने सम्भावना छ।

यस प्रणालीको प्रभावले उच्च हिमाली क्षेत्रमा हिमपात र हिमआँधी तथा पहाडी र तराईका भूभागमा वर्षा हुन सक्ने भएकाले सर्वसाधारणलाई आवश्यक सतर्कता अपनाउन सरकारले अनुरोध गरेको छ।

सुरक्षा निकायलाई उच्च सतर्कतामा राखियो

चक्रवात ‘अर्नब’को प्रभाव हिमालदेखि तराईसम्म देखिन सक्ने आकलन गर्दै सरकारले सुरक्षा निकायलाई उच्च सतर्कतामा रहन निर्देशन दिएको छ। विशेषगरी उच्च हिमाली क्षेत्रमा बाक्लो हिमपात, हिमआँधी र हिमपहिरोको जोखिम रहेकाले पूर्वतयारीलाई तीव्र बनाउन भनिएको छ।

विपद् प्रतिकार्य कमाण्ड पोष्टको बिहीबार बसेको बैठकले जोखिमयुक्त जिल्लाको अवस्थाबारे निरन्तर जानकारी लिन, सर्वसाधारणलाई समयमै सूचना प्रवाह गर्न तथा आवश्यक पूर्वतयारी गर्न सम्बन्धित निकायलाई निर्देशन दिएको थियो। सम्भावित विपद् व्यवस्थापनका लागि आवश्यक जनशक्ति र सुरक्षा संयन्त्रलाई तयारी अवस्थामा राख्न पनि भनिएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सूचना जारी गर्दै हिमाली र उच्च पहाडी क्षेत्रमा पर्वतारोहण तथा पदयात्रा नगर्न आग्रह गरेको छ। हावाहुरी, चट्याङ, हिमआँधी र भारी वर्षाको सम्भावना रहेकाले जोखिमपूर्ण यात्रा नगर्न तथा ट्रेकिङमा गइसकेका व्यक्तिलाई सुरक्षित स्थानमा बस्न सुझाव दिइएको छ।

त्यस्तै, किसानलाई कात्तिक १४ गतेसम्म धान नकाट्न पनि अनुरोध गरिएको छ।

पाँच प्रदेशमा वर्षा र हिमपातको सम्भावना

मौसम विज्ञान विभागका अनुसार चक्रवात ‘अर्नब’ बुधबार बिहान करिब ८ः१५ बजे भारतको आन्ध्र प्रदेश र यानमको तटीय क्षेत्रबाट जमिनमा प्रवेश गरेको थियो। त्यसपछि उत्तर–उत्तरपश्चिम दिशातर्फ अघि बढ्दै कमजोर भएको उक्त प्रणाली गहिरो न्यूनचापीय प्रणालीमा परिणत भएको हो।

यसको प्रभावका कारण बिहीबारदेखि नै नेपालका विभिन्न स्थानमा बादल लागेको थियो। विभागका वरिष्ठ मौसमविद् पोखरेलका अनुसार कात्तिक १४ गतेसम्म कोशी, मधेश, बागमती, गण्डकी र लुम्बिनी प्रदेशका अधिकांश स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

त्यसैगरी कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा भारी वर्षा र हिमपात हुन सक्ने अनुमान गरिएको छ।

वर्षा र हिमपातका कारण तापक्रम घट्दै जाँदा चिसोसमेत बढ्ने देखिएको छ। पहिरोको जोखिम भएका स्थान तथा सडक आसपासका क्षेत्रमा पहिरो जान सक्ने र सडक तथा हवाई यातायात प्रभावित हुन सक्ने भएकाले आवश्यक सावधानी अपनाउन विभागले आग्रह गरेको छ।

यातायात व्यवसायीलाई सम्बन्धित जिल्लाको प्रहरी तथा प्रशासनसँग समन्वय गरेर मात्रै सवारी सञ्चालन गर्ने वा नगर्ने निर्णय लिन पनि सुझाव दिइएको छ।

कात्तिक १३ देखि १६ गतेसम्मको मौसम पूर्वानुमान

२०८३ कात्तिक १३ गते (शुक्रबार)

दिउँसो: देशभर अधिकांश बदली रहनेछ। कोशी, मधेश, बागमती, गण्डकी र लुम्बिनी प्रदेशका अधिकांश स्थानमा तथा कर्णाली र सुदूरपश्चिम प्रदेशका हिमाली भूभागका अधिकांश स्थान र अन्य भूभागका धेरै स्थानमा मेघगर्जन तथा चट्याङसहित मध्यम वर्षा र हिमपातको सम्भावना छ। मधेश, बागमती, गण्डकी र लुम्बिनी प्रदेशका तराई क्षेत्रमा केही स्थानमा हावाहुरी चल्न सक्नेछ। कोशी, मधेश, बागमती, गण्डकी र लुम्बिनी प्रदेशका थोरै स्थान तथा कर्णाली र सुदूरपश्चिमका हिमाली र पहाडी भूभागका एक–दुई स्थानमा भारी वर्षा र हिमपात हुन सक्नेछ।

राति: देशभर अधिकांश बदली रहनेछ। अधिकांश स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ। केही स्थानमा भारी वर्षा र हिमपात हुन सक्नेछ।

२०८३ कात्तिक १४ गते (शनिबार)

दिउँसो: कोशी, मधेश, बागमती, गण्डकी, लुम्बिनी र कर्णाली प्रदेशमा अधिकांश बदली तथा सुदूरपश्चिम प्रदेशमा सामान्य बदली रहनेछ। कोशी, मधेश, बागमती र गण्डकी प्रदेशका धेरै स्थान तथा लुम्बिनी, कर्णाली र सुदूरपश्चिमका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ। यीमध्ये कोशी, मधेश, बागमती र गण्डकी प्रदेशका थोरै स्थान तथा अन्य प्रदेशका हिमाली र पहाडी भूभागका एक–दुई स्थानमा भारी वर्षा र हिमपात हुन सक्नेछ।

राति: देशभर सामान्य बदली रहनेछ। हिमाली र पहाडी भूभागका थोरै स्थानमा मेघगर्जन र चट्याङसहित मध्यम वर्षा तथा हिमपात हुन सक्नेछ। तराईका एक–दुई स्थानमा पनि मध्यम वर्षाको सम्भावना छ।

२०८३ कात्तिक १५ गते (आइतबार)

देशभर आंशिक बदली रहनेछ। हिमाली र पहाडी भूभागका थोरै स्थानमा हल्का वर्षा तथा हिमपात हुन सक्नेछ। तराई, उपत्यका तथा खोँचहरूमा बिहानपख केही स्थानमा हुस्सु र कुहिरो लाग्ने सम्भावना छ।

२०८३ कात्तिक १६ गते (सोमबार)

देशभर आंशिक बदली रहनेछ। हिमाली र पहाडी भूभागका एक–दुई स्थानमा हल्का वर्षा तथा हिमपात हुन सक्नेछ। तराई, उपत्यका तथा खोँचहरूमा बिहानपख केही स्थानमा हुस्सु र कुहिरो लाग्ने पूर्वानुमान गरिएको छ।