युरोपका विभिन्न राष्ट्रहरू यतिबेला असाधारण तापलहरीको चपेटामा परेका छन्। फ्रान्स, इटाली, बेलायत, स्पेन तथा अन्य मुलुकहरूमा अत्यधिक गर्मीका कारण जनजीवन प्रभावित बनेको छ। फ्रान्समा हालसम्म ४० भन्दा बढी व्यक्तिको ज्यान गइसकेको छ भने बेलायत र इटालीले उच्चतम सतर्कता चेतावनी जारी गरेका छन्।
मौसमविद्हरूका अनुसार पश्चिमी युरोपबाट फैलिएको तापलहरी क्रमशः पूर्वी युरोपतर्फ सर्दै गएको छ। फ्रान्समा अत्यधिक गर्मीबाट राहत खोज्दै नदी, ताल तथा नहरमा स्नान गर्न गएका ४० भन्दा बढी व्यक्तिको डुबेर मृत्यु भएको छ।
फ्रान्सका श्रममन्त्री जाँ पियेर फराडोले देशको अवस्थाप्रति चिन्ता व्यक्त गर्दै फ्रान्स क्रमशः अत्यधिक गर्मी हुने राष्ट्रमा रूपान्तरण हुँदै गएको बताएका छन्।
मंगलबार फ्रान्समा जुन महिनाकै सबैभन्दा उच्च तापक्रम अभिलेख गरिएको थियो। देशको औसत तापक्रम २९ दशमलव ८ डिग्री सेल्सियस पुगेको थियो भने दक्षिण–पश्चिमी लान्देस क्षेत्रमा तापक्रम ४४ दशमलव ३ डिग्री सेल्सियससम्म मापन गरिएको थियो।
अत्यधिक गर्मीका कारण उत्तर–पश्चिमी फिनिस्टर क्षेत्रमा विद्युत् रूपान्तरण केन्द्रमा समस्या उत्पन्न हुँदा करिब ६८ हजार घरपरिवार अन्धकारमा बस्न बाध्य भएका छन्। त्यस्तै, ब्रेन्योन वन क्षेत्रमा लागेको डढेलो नियन्त्रणका लागि डेढ सयभन्दा बढी अग्निनियन्त्रक परिचालन गर्नुपरेको थियो।
फ्रान्सको राष्ट्रिय मौसम निकायले ५८ क्षेत्रमा उच्चतम सतर्कता र ३१ क्षेत्रमा मध्यम सतर्कता जारी गरेको छ। आगामी शुक्रबारदेखि तापक्रम केही घट्ने सम्भावना रहे पनि हुरी, असिना तथा वर्षाको जोखिम बढ्न सक्ने अनुमान गरिएको छ।
उता इटालीको मध्य तथा उत्तरी भूभाग सबैभन्दा बढी प्रभावित बनेको छ। राजधानी रोमसहित १६ प्रमुख सहरमा उच्चतम सतर्कता लागू गरिएको छ। सरकारले खेतबारी तथा निर्माण क्षेत्रमा काम गर्ने श्रमिकहरूको सुरक्षाका लागि विशेष व्यवस्था पुनः लागू गरेको छ।
गर्मीका कारण व्यवसाय सञ्चालन गर्न नसकिने अवस्था आएमा श्रमिकहरूको पारिश्रमिक सुनिश्चित गर्न सरकारी कोषबाट सहयोग उपलब्ध गराइने व्यवस्था गरिएको छ। स्वास्थ्य अधिकारीहरूले सर्वसाधारणलाई प्रशस्त पानी पिउन, हल्का भोजन गर्न तथा अनावश्यक रूपमा घाममा ननिस्कन आग्रह गरेका छन्।
टुरिन, मिलान, भेनिस र फ्लोरेन्सजस्ता प्रमुख सहरहरूमा आपत्कालीन अवस्था सिर्जना भएको छ। बेलायतमा पनि अत्यधिक गर्मीका कारण जनजीवन प्रभावित बनेको छ। देशभर एक हजारभन्दा बढी विद्यालय बन्द गरिएका छन् वा विद्यार्थीलाई समयअघि नै घर पठाइएको छ।
इङ्गल्यान्ड र वेल्सका केही क्षेत्रमा बिहीबार रातिसम्म उच्चतम सतर्कता कायम गरिएको छ। बेलायतमा यस्तो चेतावनी जारी गरिएको यो दोस्रो अवसर हो। यसअघि सन् २०२२ मा त्यहाँको इतिहासमै पहिलोपटक तापक्रम ४० दशमलव ३ डिग्री सेल्सियस पुगेको थियो।
स्पेनको उत्तर–पूर्वी आरागोन क्षेत्रमा सबैभन्दा बढी तापक्रम मापन गरिएको छ। डढेलोको जोखिम बढेपछि परम्परागत पर्वका अवसरमा आगो बाल्ने तथा आतिशबाजी गर्ने कार्यक्रमहरू रद्द गरिएका छन्।
गर्मीबाट नागरिकलाई जोगाउन विभिन्न सहरमा शीतल सार्वजनिक आश्रयस्थल स्थापना गरिएका छन्, जहाँ मानिसहरूले गएर विश्राम गर्न सक्छन्। कानुनी व्यवस्थाअनुसार अत्यधिक गर्मी हुने समयमा श्रमिकलाई कठिन शारीरिक श्रम गराउन नपाइने व्यवस्था पनि लागू गरिएको छ।
तापलहरीको प्रभाव अब नेदरल्यान्ड्स, बेल्जियम, जर्मनी, पोल्यान्ड, क्रोएसिया तथा हंगेरीलगायतका मुलुकहरूमा समेत फैलिन थालेको छ। जर्मनीमा सप्ताहन्तसम्म तापक्रम ४० डिग्री सेल्सियस पुग्न सक्ने चेतावनी दिइएको छ भने पूर्वी युरोपका धेरै राष्ट्रहरूमा गम्भीर गर्मीको जोखिमबारे सतर्कता जारी गरिएको छ।
प्रतिक्रिया
सम्बन्धित खबर
