काठमाडौं । केन्द्रमा नेपाली कांग्रेस र नेकपा एमालेबीच बढेको राजनीतिक दूरीको असर प्रदेश सरकारमा पनि देखिन थालेको छ। कांग्रेसले एमालेसँगको सत्ता सहकार्य अन्त्य गर्ने निर्णय गरेपछि प्रदेश तहमा सरकारको संरचना, मन्त्री हेरफेर र सत्ता समीकरण पुनर्संरचनाको प्रक्रिया अघि बढेको हो।

यसको प्रभाव सुदूरपश्चिम प्रदेशमा स्पष्ट देखिएको छ। कांग्रेस नेतृत्वको प्रदेश सरकारबाट एमालेका मन्त्री हटाइएपछि एमालेले सरकारलाई दिएको समर्थन फिर्ता लिएको थियो। त्यससँगै प्रदेश सरकारको स्थायित्व र आगामी सत्ता गठबन्धनबारे दलहरूबीच नयाँ राजनीतिक कसरत सुरु भएको छ।

केन्द्रको सत्ता समीकरणमा आएको परिवर्तनले अन्य प्रदेशमा समेत प्रभाव पार्ने सम्भावना बढेको छ। प्रदेशसभाको अंकगणितअनुसार नयाँ गठबन्धन निर्माण, सरकारको निरन्तरता र मन्त्री हेरफेरको विषय अब प्रदेश राजनीतिका प्रमुख एजेन्डा बनेका छन्।