आईसीसी पुरुष टी–२० विश्वकप २०२६ को सुपर–८ चरणमा पुग्ने सबै आठ टोलीको टुंगो लागेको छ। समूह चरणका केही खेल बाँकी रहे पनि अंक तालिकाको अवस्थाका आधारमा चारै समूहबाट शीर्ष दुई टोली निश्चित भइसकेका छन्।
समूह ‘ए’: भारत र पाकिस्तान अघि
समूह ‘ए’ का सबै खेल सम्पन्न भइसकेका छन्। अपराजित रहँदै भारत चारै खेल जितेर समूह विजेता बनेको छ। पाकिस्तानले भारतबाहेक अन्य सबै टोलीलाई पराजित गर्दै ६ अंकसहित उपविजेताका रूपमा सुपर–८ मा स्थान बनाएको छ।
यस समूहबाट संयुक्त राज्य अमेरिका, नेदरल्याण्ड्स र नामिबिया प्रतियोगिताबाट बाहिरिएका छन्।
समूह ‘बी’: श्रीलंका र जिम्बाब्वेको यात्रा जारी
समूह ‘बी’ बाट श्रीलंका र जिम्बाब्वे सुपर–८ मा पुग्ने निश्चित भएको छ। यी दुई टोलीबीचको अन्तिम खेलले समूह विजेता र उपविजेताको टुंगो लगाउनेछ।
यस समूहबाट आयरल्याण्ड, अस्ट्रेलिया र ओमान बाहिरिएका छन्।
समूह ‘सी’: वेस्ट इन्डिज र इंग्ल्याण्डको प्रभावशाली प्रदर्शन
समूह ‘सी’ बाट वेस्ट इन्डिज र इंग्ल्याण्डले समान ६ अंकसहित सुपर–८ मा स्थान सुरक्षित गरेका छन्। वेस्ट इन्डिजको एक खेल बाँकी भए पनि शीर्ष स्थानमा कायम छ।
यस समूहबाट स्कटल्याण्ड, इटाली र नेपाल समूह चरणबाटै बाहिरिएका छन्।
समूह ‘डी’: दक्षिण अफ्रिका र न्यूजिल्याण्ड अगाडि
समूह ‘डी’ का सबै खेल सम्पन्न भइसकेका छन्। दक्षिण अफ्रिकाले चारै खेल जित्दै समूह विजेता बनेको छ भने न्यूजिल्याण्ड तीन जितसहित उपविजेता बनेको छ।
यस समूहबाट अफगानिस्तान, संयुक्त अरब इमिरेट्स र क्यानडा प्रतियोगिताबाट बाहिरिएका छन्।
सुपर–८ को समूह विभाजन
समूह–१: भारत, दक्षिण अफ्रिका, वेस्ट इन्डिज र जिम्बाब्वे
समूह–२: इंग्ल्याण्ड, न्यूजिल्याण्ड, पाकिस्तान र श्रीलंका
सुपर–८ चरण शनिबारदेखि सुरु हुनेछ। प्रत्येक समूहका टोलीले एक–अर्कासँग प्रतिस्पर्धा गर्नेछन् र शीर्ष दुई टोली सेमिफाइनलमा प्रवेश गर्नेछन्।
सुपर–८ को पहिलो खेल न्यूजिल्याण्ड र पाकिस्तानबीच हुनेछ। प्रतियोगिताको फाइनल खेल मार्च ८ मा हुनेछ।
प्रतिक्रिया
सम्बन्धित खबर
