काठमाडौं — इरान र संयुक्त राज्य अमेरिकाबीच दुई साताको युद्धविराम घोषणा भएको केही घण्टामै खाडी क्षेत्रका विभिन्न देशहरूमा मिसाइल र ड्रोन आक्रमणका घटना सार्वजनिक भएका छन्।

संयुक्त अरब इमिरेट्सले बुधबार आफ्नो हवाई रक्षा प्रणालीले इरानबाट आएका मिसाइल र ड्रोनहरूलाई सक्रिय रूपमा निष्क्रिय पारिरहेको जनाएको छ। रक्षा मन्त्रालयका अनुसार देशका विभिन्न भागमा सुनिएका विस्फोटका आवाजहरू हवाई रक्षा प्रणालीले बलिस्टिक मिसाइल, क्रुज मिसाइल र मानवरहित विमान (ड्रोन) अवरोध गर्दा उत्पन्न भएका हुन्।

अबुधाबीस्थित हबशन ग्यास कम्प्लेक्समा आक्रमणबाट खसेका अवशेषका कारण आगलागी भएपछि केही समयका लागि सञ्चालन स्थगित गरिएको थियो। उक्त घटनामा दुई जना यूएईका नागरिक र एक भारतीय नागरिक घाइते भएका छन्।

त्यस्तै, कुवेतले पनि बिहानदेखि इरानबाट प्रक्षेपण गरिएका ड्रोनहरूको ठूलो लहरलाई आफ्नो हवाई सुरक्षा प्रणालीमार्फत रोकेको जनाएको छ। कुवेती सेनाका अनुसार करिब २८ वटा ड्रोनलाई नियन्त्रणमा लिइएको छ।

कुवेतको रक्षा मन्त्रालयले ती ड्रोनहरू देशको दक्षिणी क्षेत्रमा रहेका महत्वपूर्ण तेल भण्डारण केन्द्र र विद्युत् संरचनालाई लक्षित गरी पठाइएको जनाएको छ।

यसैबीच साउदी अरब, कतार र बहराइनले पनि यस्तै खालका आक्रमणको जोखिम र सुरक्षा सतर्कता बढाइएको जानकारी दिएका छन्।

खाडी क्षेत्रमा बढ्दो तनावले युद्धविरामपछि पनि अवस्था पूर्ण रूपमा स्थिर नभएको संकेत दिएको छ, र यसले क्षेत्रीय सुरक्षामा थप चुनौती खडा गरेको छ।