२३ साउन, बैंकक । थाइल्यान्डको राजधानी बैंककमा १४ वर्षीय किशोरले गोली चलाउँदा आठ जनाको मृत्यु भएको छ। घटनामा २२ जना घाइते भएका छन्।

गोलीकाण्ड राजधानीको प्रतिष्ठित देब्सिरिन विद्यालयमा भएको हो। प्रहरीका अनुसार किशोरले विद्यालय पुग्नुअघि आफ्नै घरमा हजुरबुबा र हजुरआमाको समेत गोली हानी हत्या गरेका थिए।

शुक्रबार बिहान करिब ५ बजे उनले ७३ वर्षीय हजुरबुबा र ७४ वर्षीया हजुरआमालाई गोली हानेका थिए। त्यसपछि उनी हजुरबुबाकै नाममा दर्ता रहेको बन्दुक र दर्जनौँ गोली बोकेर विद्यालय जाने बसमा चढेका थिए।

बिहान करिब ८ः३० बजे पहिलो कक्षामा सहभागी भएका उनले ९ः२० बजे दोस्रो कक्षा सुरु भएको केही समयपछि बन्दुक निकालेका थिए।

प्रहरीका अनुसार किशोरले विद्यालयको छैटौँ तलामा रहेका शिक्षकहरूमाथि गोली चलाएका थिए। घटनामा पाँच शिक्षकको मृत्यु भयो। गोली लागेर घाइते भएका एक विद्यार्थीको उपचारका क्रममा मृत्यु भएको स्थानीय सञ्चारमाध्यमले जनाएका छन्।

गोली चलाउँदै भर्‍याङबाट तल झर्ने क्रममा उनले भेटिएका थप दुई जनामाथि पनि गोली चलाएको प्रहरीले जनाएको छ।

घटनाको खबर पाएलगत्तै प्रहरी विद्यालय पुगेको थियो। बिहान करिब १०ः४० बजे किशोरलाई आफैंलाई गोली हानेको अवस्थामा फेला पारिएको प्रहरीले जनाएको छ।

हजुरबुबाको कानुनी बन्दुकबाट आक्रमण

प्रहरीका अनुसार आक्रमणमा प्रयोग भएको बन्दुक किशोरका हजुरबुबाको नाममा कानुनी रूपमा दर्ता थियो। बन्दुक राख्न आवश्यक अनुमति पनि लिइएको थियो।

यही तथ्यले घटनापछि थाइल्यान्डमा बन्दुक नियन्त्रणसम्बन्धी बहसलाई थप चर्काएको छ।

थाइल्यान्डमा बन्दुकसम्बन्धी कानुन कडा भए पनि त्यसको कार्यान्वयन प्रभावकारी हुन नसकेको आलोचना हुँदै आएको छ। अनुमानअनुसार देशमा नागरिकको स्वामित्वमा करिब १ करोड ३ लाख बन्दुक छन्। तीमध्ये करिब ४० लाख अवैध रहेको बताइन्छ।

प्रधानमन्त्रीले घोषणा गरे नयाँ कानुन

घटनापछि प्रधानमन्त्री अनुतिन चार्नविराकुलले सार्वजनिक स्थानमा बन्दुक बोक्न थप कडाइ गर्ने गरी नयाँ कानुन ल्याउने घोषणा गरेका छन्।

प्रस्तावित व्यवस्थाअनुसार ड्युटीमा रहेका सरकारी अधिकारीबाहेक अन्य व्यक्तिले सार्वजनिक स्थानमा बन्दुक बोक्न नपाउने व्यवस्था गरिनेछ।

गृहमन्त्री रहेका बेला अनुतिनले नयाँ बन्दुक अनुमतिपत्र जारी गर्न अस्थायी रोक लगाउने तथा बन्दुक आयातमा प्रतिबन्ध लगाउनेलगायतका उपाय अघि सारेका थिए।

थाइल्यान्डमा अवैध रूपमा बन्दुक राखेको अभियोगमा १० वर्षसम्म कैद सजाय हुने व्यवस्था छ।

‘पूर्वतयारीसहित भएको आक्रमण’

थाइल्यान्डका राष्ट्रिय प्रहरी प्रमुख जनरल कित्तरात फानफेतले घटनास्थलमा गरिएको फरेन्सिक परीक्षणबाट किशोरले चलाएका गोली निकै सटीक रहेको बताएका छन्।

उनका अनुसार केही गोली शरीरका संवेदनशील अंगलाई लक्षित गरी चलाइएको देखिएको छ।

प्रधानमन्त्री अनुतिनले पनि घटना आकस्मिक नभई पूर्वतयारीसहित भएको देखिएको बताएका छन्। उनका अनुसार आक्रमणमा ‘स्पष्ट चरण र स्पष्ट लक्ष्य’ देखिएको छ।

प्रहरीले किशोरका विद्युतीय उपकरण जाँच गर्दा अमेरिकामा भएका विद्यालय गोलीकाण्डसँग सम्बन्धित केही भिडियोसमेत फेला पारेको स्थानीय सञ्चारमाध्यमले जनाएका छन्।

तर परिवारका सदस्यहरूले किशोरलाई सामान्यतः शान्त र राम्रो व्यवहार गर्ने व्यक्तिका रूपमा वर्णन गरेका छन्। उनका काकाका अनुसार किशोर धेरैजसो समय घरभित्रै बसेर हिंसात्मक भिडियो गेम खेल्थे र कमै बाहिर निस्कन्थे।

परिवारले भने उनले यस्तो आक्रमणको तयारी गरिरहेको कुनै संकेत नपाएको बताएको छ।

प्रतिष्ठित विद्यालयमा रक्तपात

सन् १८८५ मा स्थापना भएको देब्सिरिन विद्यालय थाइल्यान्डका प्रतिष्ठित माध्यमिक विद्यालयमध्ये एक हो। यसका पूर्वविद्यार्थीमा कूटनीतिज्ञ, खेलाडी र पूर्वप्रधानमन्त्रीसमेत छन्।

विद्यालयभित्रै भएको यो रक्तपातपछि थाइल्यान्डमा नागरिकको हातमा रहेका बन्दुकको नियमन, बन्दुक अनुमति प्रणाली र कानुन कार्यान्वयनको प्रभावकारितामाथि फेरि प्रश्न उठेको छ।

प्रधानमन्त्री अनुतिनले घटनापछि सार्वजनिक स्थानमा हतियार बोक्न थप कडाइ गर्ने प्रतिबद्धता जनाएका छन्। अब सरकारले ल्याउने भनिएको नयाँ कानुनले नागरिकको हातमा रहेका बन्दुकमाथिको नियन्त्रण कति प्रभावकारी बनाउँछ भन्ने विषय चासोको केन्द्रमा परेको छ।