काठमाडौं।
युक्रेन र फ्रान्सले संयुक्त रूपमा हतियार उत्पादन सुरु गर्ने सहमति गरेका छन्। किभमा दुवै देशका रक्षा मन्त्रीबीच भएको भेटपछि यो निर्णय सार्वजनिक गरिएको हो।

रूसले आक्रमण थालेयता फ्रान्स युक्रेनको प्रमुख सहयोगी राष्ट्रका रूपमा रहँदै आएको छ। यस अवधिमा फ्रान्सले युक्रेनलाई सैन्य सहायता मात्र होइन, राजनीतिक समर्थन पनि निरन्तर प्रदान गर्दै आएको छ।

भेटपछि युक्रेनका रक्षामन्त्री मिखाइलो फेदोरोभले सामाजिक सञ्जालमार्फत जानकारी दिँदै रक्षा उद्योग क्षेत्रमा ‘ठूलो स्तरका संयुक्त परियोजना’ अघि बढाउने आशयपत्रमा दुवै देशले हस्ताक्षर गरेको बताएका छन्। उनले अब युक्रेन र फ्रान्स आपूर्तिमा सीमित नरही संयुक्त उत्पादन र दीर्घकालीन समाधानतर्फ उन्मुख हुने स्पष्ट पारेका छन्, जसले युक्रेनको रक्षा क्षमता क्रमशः सुदृढ बनाउने अपेक्षा गरिएको छ।

हाल कुन–कुन प्रकारका हतियार उत्पादन गरिनेछ र उत्पादन कहिलेदेखि सुरु हुनेछ भन्ने विषयमा विस्तृत विवरण सार्वजनिक गरिएको छैन। तर भेटका क्रममा युक्रेनलाई थप फ्रान्सेली हतियार तथा सैन्य उपकरण उपलब्ध गराउने विषयमा छलफल भएको बताइएको छ। यसमा क्षेप्यास्त्र प्रणाली, लडाकु विमान तथा हवाई प्रतिरक्षा प्रणालीहरू समावेश रहेको जनाइएको छ।

फ्रान्सकी रक्षामन्त्री क्याथरिन भोट्रिनले सामाजिक सञ्जालमार्फत फ्रान्स युक्रेनी जनताको साथमा सधैं रहने प्रतिबद्धता दोहोर्‍याएकी छन्। फ्रान्सले गत वर्ष युक्रेनलाई दुई अर्ब युरो बराबरको सैन्य सहायता प्रदान गर्ने घोषणा गरेको थियो। यसअघि नोभेम्बरमा युक्रेनी राष्ट्रपति भोलोदिमिर जेलेन्स्की र फ्रान्सेली राष्ट्रपति इम्यानुएल माक्रोंबीच युक्रेनलाई अत्याधुनिक लडाकु विमान उपलब्ध गराउने सम्भावनासम्बन्धी आशयपत्रमा समेत हस्ताक्षर भएको थियो।

विशेषज्ञहरूका अनुसार यस सहमतिले युक्रेनको रक्षा उद्योगलाई थप मजबुत बनाउने र युरोपेली सुरक्षा सहकार्यलाई नयाँ चरणमा प्रवेश गराउने अपेक्षा गरिएको छ।